Azərbaycan, Bakı, 13 oktyabr /Trend, müxbir H.Vəliyev/
"Xalq kompüteri" layihəsinin həyata keçirilməsinə beş milyon manatdan çox investisiya qoyulub. Bu barədə çərşənbə günü "Best Comp Group" şirkətinin direktoru Rauf Həsənov deyib.
Həsənovun sözlərinə görə, layihə çərçivəsində doqquz min kompüter satılıb, onlardan 1610 ədədi Bakıda, qalanı isə regionlarda satılıb.
Satılan ümumi texnikanın sayının 70 faizindən çoxu portativ qurğuların payına düşür.
Layihə çərçivəsində ümumilikdə 100-dən çox netbuk, 7950-yə yaxın noutbuk, 940-dan çox masaüstü kompüter satılıb.
8955 ədəddən çox kompüter müəllimlər, 40 ədədi isə şagird və tələbələr tərəfindən alınıb.
Layihə ötən ilin aprelində start götürüb. Təqdim olunan kompüterlər orta məktəb müəllimləri üçün nəzərdə tutulub və onların satışı bazar qiymətindən 25-40 faiz aşağı qiymətə, 12 aylıq faizsiz kredit şərtləri ilə həyata keçirilir.
Alıcılara "Symantec" antivirus proqram təminatı və KÜR ADSL modemləri də təqdim olunur. İyulun əvvəlində "İntel" şirkəti layihədə iştiraka maraq göstərib. Şirkət layihədə iştirak imkanlarına baxmağa hazır olduğunu bildirib.
Layihə çərçivəsində Azərbaycan Rabitə və İnformasiya Texnologiyaları Nazirliyinin Məlumat-Hesablama Mərkəzi tərəfindən ADSL üzrə internetdən güzəştli şərtlərlə istifadə üçün proqram təminatı hazırlanıb. Mərkəz uçot sisteminin yaradılması üzrə işləri başa çatdırıb və kredit ödənişləri elektron ödəmələr vasitəsilə həyata keçirilir. Layihəyə elektron kommersiya sistemi də cəlb olunub ki, bu da kompüterləri /www.xalqkomp.az/ internet resursu vasitəsilə almağa imkan verir.
Layihə HP və "Microsoft" şirkətlərinin iştirakı ilə, texnika tədarükü isə HP-nin yerli tərəfdaşı olan "Best Comp Group" şirkəti vasitəsilə həyata keçirilir.