Azərbaycan, Bakı, 12 yanvar /Trend, müxbir H.Vəliyev/
Azərbaycanda elektron rəqəmsal imzanın verilməsi üçün infrastruktur təcrübi istismara tam hazırdır. Bu barədə çərşənbə günü Azərbaycan Rabitə və İnformasiya Texnologiyaları Nazirliyinin elmi potensial və strateji planlaşdırma şöbəsinin direktoru İsfəndiyar Əliyev deyib.
Əliyevin sözlərinə görə, 2011-ci ilin birinci rübündə müvafiq prosedurlar hazırlandıqdan sonra elektron rəqəmsal imzanın verilməsinə başlamaq planlaşdırılır.
"Verilmə prosesini tənzimləyən normativ-hüquqi sənədlər hazırlandıqdan sonra bu prosedurun həm dövlət, həm də özəl şirkətlər üçün dəyəri müəyyənləşəcək", - Əliyev qeyd edib.
Layihə "Elektron imza və elektron sənəd haqqında" qanuna əsasən "Ultra", "Azerin" və "Microsoft"un yerli nümayəndəliyindən ibarət konsorsium tərəfindən həyata keçirilir.
Elektron rəqəmsal imzanın verilməsi mərkəzinin yaradılmasına orta hesabla 3 milyon dollara ayxın vəsait lazımdır.
Azərbaycanda rəqəmsal imzanın verilməsi üzrə üç mərkəzin cəlb olunması planlaşdırılır. Onların ikisi dövlət və özəl strukturlara xidmət göstərəcək, digəri isə baş mərkəz olacaq.
Elektron imza xüsusi proqram təminatlı əsas sənədin yaranması hesabına əldə olunan rəmzlərin müəyyən ardıcıllığını özündə ehtiva edir. Göndərilmə zamanı əsas sənədə rəqəmli imza əlavə olunur ki, bunun da nəticəsində müəlliflik və sənəddəki məlumatın dəyişməzliyi öz təsdiqini tapır. Əsas sənədə istənilən dəyişiklik etməklə elektron imza öz qüvvəsini itirir.
Rəqəmsal imzanın əldə olunması təşkilatın internet şəbəkəsi vasitəsilə mübadilə etdiyi sənədin müəllifliyi və məzmunu ilə bağlı əmin olmağa imkan verir. Elektron imzanı saxtalaşdırmaq mümkün deyil. Rəqəmsal imza ilə imzalanmış sənəd və əllə imzalanmış sənəd bərabər tutulur.