Azərbaycan, Bakı, 4 fevral /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi rəqəmsal imzaların verilməsi mərkəzinin rəsmi açılışına hazırlaşır. Bu barədə Trend-ə cümə günü nazirliyin Elmi potensial və strateji planlaşdırma şöbəsinin direktoru İsfəndiyar Əliyev məlumat verib.
Əliyevin sözlərinə görə, rəqəmsal imzaların verilməsi infrastrukturu ilin I rübünün sonunda istismara veriləcək.
"Bu gün rəqəmsal imzaların verilməsi prosesini nizamlayan normativ-hüquqi sənədlərin hazırlanması üzrə işlər yekun mərhələdədir", - o, deyib.
Bir müddət əvvəl Əliyevin dediyi kimi, normativ-hüquqi sənədlərin hazırlanmasından sonra həm dövlət, həm də özəl müəssisələr üçün rəqəmli imzaların dəyəri də müəyyən ediləcək.
Layihə Ultra, Azərin və Microsoftun yerli nümayəndəliyindən ibarət konsorsium tərəfindən həyata keçirilir.
Test işləri də daxil olmaqla, rəqəmsal imzaların açarlarının verilməsi mərkəzinin yaradılmasına orta hesabla üç milyon dollara yaxın vəsait tələb olunur. Azərbaycanda rəqəmsal imzaların verilməsi üzrə üç mərkəz fəaliyyət göstərəcək ki, onlardan ikisi dövlət və özəl strukturların xidmətlərini yerinə yetirəcək, biri isə baş mərkəz olacaq.
Qəbul olunmuş beynəlxalq normalara əsasən, rəqəmsal imzaların verilməsi ödənişli əsaslarla həyata keçiriləcək.
Elektron imza xüsusi proqram təminatlı əsas sənədin yaranması hesabına əldə olunan rəmzlərin müəyyən ardıcıllığını özündə ehtiva edir. Göndərilmə zamanı əsas sənədə rəqəmli imza əlavə olunur ki, bunun da nəticəsində müəlliflik və sənəddəki məlumatın dəyişməzliyi öz təsdiqini tapır. Əsas sənədə istənilən dəyişiklik etməklə elektron imza öz qüvvəsini itirir.
Rəqəmli imzanın əldə olunması təşkilatın İnternet şəbəkəsi vasitəsilə mübadilə etdiyi sənədin müəllifliyi və məzmunu ilə bağlı əmin olmağa imkan verir. Elektron imzanı saxtalaşdırmaq mümkün deyil. Rəqəmli imza ilə imzalanmış sənəd əllə imzalanmış sənədlə bərabər tutulur.
