Azərbaycan, Bakı, 24 fevral /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi elektron-rəqəmsal imzanın dəyərini müəyyənləşdirir. Bu barədə Trend-ə cümə axşamı nazirliyin Elmi potensial və strateji planlaşdırma şöbəsinin direktoru İsfəndiyar Əliyev məlumat verib.
Əliyevin sözlərinə görə, rəqəmsal imzanın dəyəri istifadəçi kateqoriyasından asılı olaraq müəyyən ediləcək və qiymət həm əhali, həm də dövlət müəssisələri üçün müxtəlif olacaq.
"Hazırda rəqəmsal imzaların verilməsi infrastrukturu təcrübi istismara tam hazırdır, onun rəsmi istismara verilməsi mərasimi Novruz bayramına gözlənilir", - o, qeyd edib.
Azərbaycanda rəqəmsal imzaların verilməsi üzrə üç mərkəz fəaliyyət göstərəcək ki, onlardan ikisi dövlət və özəl strukturların xidmətlərini yerinə yetirəcək, biri isə baş mərkəz olacaq.
Elektron imza xüsusi proqram təminatlı əsas sənədin yaranması hesabına əldə olunan rəmzlərin müəyyən ardıcıllığını özündə ehtiva edir. Göndərilmə zamanı əsas sənədə rəqəmli imza əlavə olunur ki, bunun da nəticəsində müəlliflik və sənəddəki məlumatın dəyişməzliyi öz təsdiqini tapır. Əsas sənədə istənilən dəyişiklik etməklə elektron imza öz qüvvəsini itirir.
Rəqəmli imzanın əldə olunması təşkilatın İnternet şəbəkəsi vasitəsilə mübadilə etdiyi sənədin müəllifliyi və məzmunu ilə bağlı əmin olmağa imkan verir. Elektron imzanı saxtalaşdırmaq mümkün deyil. Rəqəmli imza ilə imzalanmış sənəd əllə imzalanmış sənədlə bərabər tutulur.