Azərbaycan, Bakı, 28 mart /Trend, müxbir H.Vəliyev/
Türkiyənin kompleks proqram təminatı istehsalçısı "Netcad" şirkəti Azərbaycanın softver bazarına çıxdığını elan edib. Bu barədə şirkətin bazar ertəsi yaydığı məlumatda deyilir.
Bu gün şirkət tərəfindən priqram vasitələrinin Azərbaycan bazarına inteqrasiyası üzrə distribüter sazişi imzalanıb.
Eyni vaxtda "Netcad"ın həlləri Gürcüstan, Qazaxıstan, İran, Almaniya və Banqladeş bazarlarına da çıxarılacaq.
"Netcad"ın regional idarəetmənin avtomatlaşdırılması üçün korporativ geoinformasiya sistemləri (GİS) universal həlləri Türkiyənin və digər ölkələrin yerli idarəetmə orqanlarında yayılıb. "Netcad"ın proqram məhsulları və sistem həlləri milli standartlara uyğunlaşdırıla bilir.
Şirkətin GİS avtomatlaşdırılmış informasiya sistemləri xəritəçəkmə, torpaq, meşə, kənd təsərrüfatı kadastrı, torpaq tənzimləməsi, daşınmaz əmlakın qeydiyyatı, şəhərsalma, memarlıq və şəhər yaşayış məntəqələrinin planlaşdırılması, landşaft planlaşdırması, ərazi idarəetməsi və digər sahələrdə tətbiq edilir.
Şirkət "Open Geospatial Consortium"un (OGC) assosiativ iştirakçısıdır, WMS, WFS və Google Earth dünya xəritələri xidmətlərində iş üçün SFS şəhadətnaməsinə malikdir.