Azərbaycan, Bakı, 30 mart /Trend, müxbir H.Vəliyev/
Azərbaycanın 4 ali məktəbi "Microsoft IT Academy" proqramını həyata keçirməyə hazır olduqlarını bildirib. Bu barədə çərşənbə günü "Microsoft Azerbaijan" şirkətinin "Təhsildə tərəfdaşlıq" proqramı üzrə meneceri Emin Axundov deyib.
Axundovun sözlərinə görə, kampaniyaya artıq Bakı Kompüter Kolleci, Azərbaycan Dövlət İqtisad Universiteti, "Qafqaz" Universiteti və Bakı Slavyan Universitetindən müraciət daxil olub.
"İT-akademiyanın işə salınması çox səy tələb etmir, lakin məsələ onların [ali məktəblərin] hazır olmasında, daha dəqiq desək, mütəxəssislərin olmasındadır. Dörd il əvvəl biz bu proqramın Azərbaycan Texniki Universitetində həyata keçirilməsinə yardım etmişik. Lakin təəssüf ki, bu layihəni uğurlu adlandırmaq olmaz, çünki o, özünü doğrultmadı", - Axundov qeyd edib.
Axudnovun sözlərinə görə, bununla belə, ali məktəblər arasında bu proqrama maraq var və buna sübut kurrikulumun bir hissəsi olan "Xəzər" Universitetində həyata keçirilən "Cisco" şəbəkə akademiyası ola bilər.
"Xəzər" Universitetində həyata keçirilən "Cisco" şəbəkə akademiyası tələbənin iştirak edib-etməməsi olmaqla, adi fakültə kursu yox, proqramın bir hissəsidir. Hazırda mahiyyət ondan ibarətdir ki, ali məktəblərdə başa düşüblər ki, təkcə nəzəriyyəni deyil, həm də praktikanı öyrənmək lazımdır. Praktika olanda isə bilavasitə bizlərdən birinə müraciət etmək ehtiyacı yaranır. Yəni bu gün elə anlayış formalaşıb ki, şirkətin özündən başqa heç kim Microsoft-un məhsullarını yaxşı bilmir, İT-akademiya isə bu biliklərin təyinatı üzrə istifadəsi üçün ən yaxşı variantdır", - Axundov vurğulayıb.
"Microsoft IT Academy" proqramı ali və orta məktəblər üçün hazırlanıb və təhsil alanların Microsoft-un sertifikatlaşdırılmış imtahanlarının verilməsinə hazırlanmasını nəzərdə tutur. Təhsilin sonunda hər bir tələbəyə dünya səviyyəli sertifikatın alınmasına sertifikatlaşdırılmış imtahandan keçmək haqqında diplom verilir.
