Azərbaycan, Bakı, 6 aprel /Trend, müxbir H.Vəliyev/
Azərbaycanın İT şirkəti AZEL "Symantec"in informasiya təhlükəsizliyi sisteminin ARDNŞ-nin korporativ şəbəkəsinə inteqrasiyası ilə bağlı danışıqlar aparır. Bu barədə çərşənbə günü AZEL şirkətinin Direktorlar Şurasının sədri Rasim İbrahimov deyib.
İbrahimovun sözlərinə görə, layihə "Symantec Security Information Manager"in (SSIM) Azercell Telekom-un şəbəkəsində həllərin instalyasiyası üzrə işlərin analoqu olacaq.
SSIM informasiya təhlükəsizliyi sistemi daha vacib biznes-əlavələrə qarşı yönələn təhlükəsizlik təhdidlərini aşkar etmək, onların prioritetlərini müəyyənləşdirmək, təhlil etmək və onları aradan qaldırmaq qabiliyyətinə malikdir. Sistem baş verən bütün hadisələri sənədləşdirməyə və onları bir neçə il ərzində saxlamağa imkan verir. Həllər əsasən iri şirkət və böyük sayda serverlərin və mürəkkəb telekommunikasiya sistemlərinin istifadə edildiyi dövlət və özəl sektorun müəssisələri üçün nəzərdə tutulub.
Azercell Telecom-un şəbəkəsində informasiya təhlükəsizliyi sisteminin inteqrasiyası üzrə işlər mürəkkəb biznes-qərarların tətbiqi üzrə kompleks tədbirlərin həyata keçirilməsini nəzərdə tutur. Yaranan zərurətlə əlaqədar olaraq, layihə operatorun texniki infrastrukturunun müəyyən hissələrinin daha etibarlı qorunması üçün əlavə məhsullar tətbiq edilməklə genişləndirilib.
Bundan əvvəl "Symantec" şirkətinin Qazaxıstan, Mərkəzi Asiya və Cənubi Qafqazda satış üzrə direktoru Aleksandr Yakuninin dediyinə görə, sistem daha mühüm biznes-əlavələrə yönələn təhlükəsizlik təhdidlərini aşkar edir, onların prioritetlərini analiz edərək aradan qaldıra bilir.
Yakuninin sözlərinə görə, "Symantec" şirkətinin Azərbaycandakı biznesi daha çox korporativ bazara istiqamətlənib. Telekommunikasiya və maliyyə sektorları, eləcə də dövlət proqramları böyük maraq doğurur.
