Azərbaycan, Bakı, 26 aprel /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyi elektron rəqəmsal imzaların dəyərinin müəyyən edilməsində müxtəlif yanaşmaları nəzərdən keçirir. Trend-in məlumatına görə, bu barədə çərşənbə axşamı rabitə və informasiya texnologiyaları nazirinin müavini Elmir Vəlizadə bildirib.
Rəqəmli imzaların dəyəri istifadəçi kateqoriyasından asılı olaraq dəyişəcək.
Nazir müavininin sözlərinə görə, Azərbaycanda elektron rəqəmsal imzaların verilmə infrastrukturu istismara tam hazırdır, onun yaxın vaxtlarda təcrübi istismara veriləcəyi gözlənilir.
"Elektron imza elektron sənəd dövriyyəsinin tərkib hissəsidir və sənədin mənbəyini və müəllifini eyniləşdirməyə imkan verir. Ümumilikdə elektron sənəd dövriyyəsinin inkişafı sahəsində həm təşkilati, hüquqi, həm də texniki xarakterli bir çox məsələlər mövcuddur və onların həll olunması üçün kompleks yanaşma vacibdir", - Vəlizadə deyib.
Bir müddət əvvəl Azərbaycan Rabitə və İnformasiya Texnologiyaları Nazirliyinin elmi potensial və strateji planlaşdırma şöbəsinin müdiri İsfəndiyar Əliyevin Trend-ə dediyi kimi, rəqəmsal imza Azərbaycanda elektron ticarətin inkişafı üçün platforma olacaq.
Onun sözlərinə görə, rəqəmsal imzanın əsas üstünlüyü işgüzar münasibətlərin və rabitənin tam elektron formata keçirilməsidir.
Azərbaycanda rəqəmsal imzaların verilməsi üzrə üç mərkəz fəaliyyət göstərəcək ki, onlardan ikisi dövlət və özəl strukturların xidmətlərini yerinə yetirəcək, biri isə baş mərkəz olacaq.
