Azərbaycan, Bakı, 16 sentyabr /Trend, müxbir H.Vəliyev/
Azərbaycan Əmək və Əhalinin Sosial Müdafiəsi Nazirliyi öz portalı vasitəsilə elektron xidmətləri tətbiq edib. Bu barədə Trend-ə cümə günü nazirliyin ictimaiyyətlə əlaqələr şöbəsinin rəhbəri Asəf Əliyev deyib.
Hazırda nazirliyin saytında vətəndaşların elektron müraciəti, əlavə təhsil almaq və peşəkar vərdişləri artırmaq, ictimai işlərdə iştirak etmək istəyənlərin elektron qeydiyyatı və digər xidmətlər işləyir.
Onun sözlərinə görə, xidmətlər vətəndaşlarla elektron əməkdaşlıq, vətəndaşların nazirliklə elektron şəkildə onları maraqlandıran bütün məsələlərlə bağlı ünsiyyətini nəzərdə tutur.
Nazirliyin xidmətləri həmçinin oktyabrın başlanğıcında işə salınması gözlənən "Elektron hökumət" portalında da təqdim olunacaq.
"Elektron hökumət" portalı vətəndaşlar, hökumət və özəl sektor müəssisələri ilə işi dəstəkləyan mühüm alət olacaq. Portalın məqsədi vətəndaşlardan tələb olunan sənədləri idarələrin özləri arasında bir-biriləri ilə elektron şəkildə əməkdaşlıq etmələri hesabına azaltmaqdır.
Hazırda Azərbaycan Əmək və Əhalinin Sosial Müdafiəsi Nazirliyi ilə yanaşı, portala Azərbaycan Rabitə və İnformasiya Texnologiyaları Nazirliyi, Vergilər Nazirliyi, Dövlət Gömrük Komitəsi və Dövlət Sosial Müdafiə Fondu da qoşulub.
Portalda təmsil olunan dövlət strukturlarının sayı idarələrin İT-infrastrukturunun bu işə hazırlığından asılı olaraq artacaq.
