Azərbaycan, Bakı, 26 sentyabr /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyinin "Aztelekom" İstehsalat Birliyi Yardımlı Telekommunikasiya Qovşağının (TKQ) "Trans-Asiya-Avropa" (TAA) optik-lif seqmentinə birləşdirilməsini başa çatdırır. Bu barədə bazar ertəsi Trend-ə İB-dən bildirilib.
Əvvəllər rayonda beynəlxaql və şəhərlərarası istiqamətlərdə rabitə xidmətləri Lerik rayonun telekommunikasiya infrastrukturundan istifadə olunmaqla həyata keçirilirdi ki, bu da az effektli idi.
Məlumata görə, Yardımlı TKQ-nin TAA seqmentinə qoşulması operatorun göstərdiyi telekommunikasiya xirmətlərinin keyfiyyətinin xeyli artırılmasına imkan verəcək.
TAA layihəsinin həyata keçirilməsi 1999-cu il oktyabrın 21-də Azərbaycan, Gürcüstan və Türkiyə arasında imzalanmış üçtərəfli protokolla razılaşdırılıb. Elə həmin ilin dekabrında TAA-nın Azərbaycan seqmentinin tikintisinə başlanılıb. 2001-ci ildə seqmentin quru hissəsinin tikintisi başa çatıb və Bakı ilə Tbilisi arasında rabitə kanalları TAA optik-lif magistralına keçirilib.
Optik-lif magistralının istismara verilməsi Azərbaycan, Gürcüstan, Türkiyə, İran, Rusiya və Ukrayna arasında birbaşa rabitənin yaradılmasına imkan verir.
Ölkənin TAA seqmentinə qoşulmuş rayonlarında İnternet şəbəkəsinə qoşulma imkanları genişlənib, rabitənin keyfiyyəti yaxşılaşıb və s.