Azərbaycan, Bakı, 12 oktyabr /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyinin "Bakı Telefon Rabitəsi" İstehsalat Birliyi stasionar telefon rabitəsi xidmətlərinin vaxthesabı ödənişi üçün iki paket hazırlayıb. Trend-in məlumatına görə, bu barədə çərşənbə günü İB-nin baş direktoru Beytulla Hüseynov bildirib.
"Birinci paket hazırkı iki manat məbləğində mövcudc aylıq abunə ödənişinin saxlanmasını nəzərdə tutur ki, buraya 450 dəqiqəlik danışıq müddəti limiti daxil ediləcək", - Hüseynov deyib.
Bir az əvvəl İB-dən Trend-ə deyildiyi kimi, limitdən yuxarı hər bir dəqiqənin dəyəri 0,07 qəpik olacaq.
Hüseynovun sözlərinə görə, ikinci paket dəyəri beş manat olan limitsiz əlaqəni nəzərdə tutur.
"Stasionar telefon rabitəsi xidmətlərinin vaxthesabı ödəniş sisteminin tətbiqi rabitə xidmətləri üzrə tariflərin qiymətlərinin artırılması üzrə konkret məqsədi güdmür. Orada bir sıra üstünlüklər və abunəçilər üçün güzəştlər nəzərdə tutulub. Məsələn, şəhərlərarası zənglərə görə borca baxmayaraq, abunəçinin telefon xətti bağlanmayacaq", - Hüseynov deyib.
Onun sözlərinə görə, bununla yanaşı, abunəçilər multimedia xidmətlərinə avtomatik qoşulma imkanı əldə edəcəklər.
Hüseynov bildirib ki, hazırda Avropa və MDB-nin bəzi ölkələrinin stasionar rabitə şəbəkələrində vaxthesabı ödəniş sistemi tətbiq edilir.
O bildirib ki, operator tərəfindən Bakı şəhərində aparılan araşdırmalara görə, abunəçilərin təxminən 70 faizinin danışıq müddəti ayda 400-450 dəqiqədən çox olmur.
Bir az əvvəl İB-dən deyildiyi kimi, vaxthesabı ödəniş sisteminin tətbiqi gələn ilin əvvəllərinə gözlənilir.
Bu gün operatorun infrastrukturu ümumilikdə bu xidmətlərin tətbiqinə hazırdır. Lakin İB-dən deyildiyi kimi, hələlik əsasən billinq sistemi ilə bağlı həll olunmamış müəyyən texniki məsələlər mövcuddur.
Oktyabrın 12-nə rəsmi məzənnə 0,7868 AZN/USD təşkil edir.
