Azərbaycan, Bakı, 4 noyabr /Trend, müxbir H.Vəliyev/
Azərbaycanın rabitə operatoruna 3G standartında rabitə xidmətləri göstərmək üçün verilən tezliklər kabel televiziyası operatoru - B&B TV şirkəti tərəfindən istifadə olunmur. Trend-in məlumatına görə, bu barədə cümə günü jurnalistlərə "Azercell" (mobil rabitə operatoru) şirkətinin rəhbəri Əli Ağan deyib.
Buna baxmayaraq, B&B TV bunun əksini bəyan edir.
"Biz dünyanın iri şirkətinin [şirkətin adı göstərilmir] xidmətlərindən yararlanaraq, 3G-ni sınaqdan keçirdik və skan etmənin nəticələri bu tezliklərdən istifadə edilmədiyini göstərdi", - Ağan bildirib.
Onun sözlərinə görə, B&B TV tezliklərin mobil operatora verilməsi üçün "astronomik məbləğ" də tələb edir.
"B&BTV Communications"ın rəhbəri Səbinə Babayeva Trend-ə bildirib ki, şirkət cümə axşamı 1 saylı Bakı şəhər İnzibati-İqtisadi Məhkəməsinə Dövlət Radiotezliklər İdarəsinin 3G şəbəkəsinin yerləşdirilməsi üçün mobil rabitə operatorlarına tezliklərin verilməsinə dair qərarı ilə bağlı müraciət edib.
"Məhkəmə şirkətin müraciətini əsaslı hesab edərək B&BTV-nin xeyrinə qərar çıxarıb. Şirkət tərəfindən Dövlət Radiotezliklər İdarəsinin qərarının yerinə yetirilməməsi isə mövcud strukturlar arasında oktyabrın 25-dən başlanan məhkəmə mübahisəsi ilə bağlıdır", - Babayeva deyib.
Bir az əvvəl Azərbaycanın Dövlət Radiotezliklər İdarəsi mobil rabitə operatorları "Azercell" və "Baksell"ə 3G standartında rabitə xidmətlərinin göstərilməsi üçün tezlik ayırıb. Söhbət operatora 1900-2100 Mhz tezlik resursunun verilməsindən gedir.
Hökumət tərəfindən lisenziyanın rəsmi qiyməti 11 min manat məbləğində müəyyənləşdirilib. Hazırda 3G standartında rabitə xidməti göstərmək üçün lisenziyaya yalnız Azerfon şirkəti malikdir.