Azərbaycan, Bakı, 23 noyabr /Trend, müxbir H.Vəliyev/
2012-ci ilin may ayına qədər Naxçıvan Muxtar Respublikasının bütün ərazisi rəqəmsal televiziya siqnalı ilə əhatə olunacaq. Bu barədə çərşənbə günü Trend-ə "B&BTV Communications" kabel operatoru şirkətinin rəhbəri Səbinə Babayeva deyib.
Onun sözlərinə görə, hazırda radioverici aparatların quraşdırılması aparılır. Bu işləri gələn ilin ortalarına qədər başa çatdırmaq planlaşdırılır.
Babayeva qeyd edib ki, Bakı və digər regionlar üzrə işlər üçün şirkətə tezliklər lazımdır.
"Biz Rabitə və İnformasiya Texnologiyaları Nazirliyi ilə saziş imzalamışıq. Hazırda əsas məsələ Azərbaycan Radiotezliklər üzrə Dövlət Komissiyasına desimetrlik tezlik spektrinin verilməsidir. Bu tezliklər arasında azad olanları və bu gün telekanallar tərəfindən istifadə edilənləri var. Bu gün onların istifadəsi müzakirə edilir ki, bununla da digər şirkətlərin işində maneələr yaradılmasın", - Babayeva deyib.
