Azərbaycan, Bakı, 25 noyabr /Trend müxbir H.Vəliyev/
Rabitə və İnformasiya Texnologiyaları Nazirliyinin tapşırığına əsasən, Azərbaycanın mobil rabitə operatorları öz şəbəkələrini dördüncü nəsil (4G) şəbəkəsinə uyğunlaşdırırlar. Trend-in məlumatına görə, bu barədə cümə günü jurnalistlərə Azərbaycan rabitə və informasiya texnologiyaları naziri Əli Abbasov deyib.
Abbasovun sözlərinə görə, operatorlar 4G-nin tətbiqi üçün lazımi infrastruktur hazırlayırlar, nazirlik isə öz növbəsində, onların 4G-ni işə salmaq üçün lazım olan tezliklərin almalarını təşkil edəcək.
Nazirlik bir müddət əvvəl 3G standartında xidmətlər göstərmək üçün Azərbaycanın bütün mobil rabitə operatorlarına lisenziyalar verib və tezliklər təqdim edib. Lisenziyalar verilərkən şirkətlərə 4G standartının tətbiqini nəzərdən keçirmək də tövsiyə edilib.
Hazırda hər üç operator 4G-nin tətbiqi üzrə təkliflə Nazirliyə müraciət ediblər.