Azərbaycan, Bakı, 24 yanvar /Trend, müxbir H.Vəliyev/
2011-ci ildə Azərbaycanda internet bazarının həcmi 60 milyon manatı ötüb. Bu barədə çərşənbə axşamı Trend-ə Azərbaycanın Rabitə və İnformasiya Texnologiyaları Nazirliyinin Maliyyə, uçot və iqtisadi təhlil şöbəsinin aparıcı məsləhətçisi Cahandar Qədirov bildirib.
Onun sözlərinə görə, 2011-ci ildə internet bazarının gəlirlərinin həcmi 2010-cu illə müqayisədə 1,2 dəfə artıb.
Azərbaycanda internet bazarı əhəmiyyətli artım potensialına malikdir. Son illər ərzində İT bazarının bu seqmenti internet istifadəçilərinin sayında durmadan artım nümayiş etdirir.
"Ötən ilin yekunları üzrə Azərbaycanda internetin nüfuz səviyyəsi 65 faizə çatıb ki, bu da 2010-cu ilin göstəriciləri ilə müqayisədə 30 faiz çoxdur", - Qədirov deyib.
Son bir il ərzində ölkədə internet tarifləri (AztelekomNet və BakinterNet dövlət internet servis provayderləri şəbəkəsində) 30-50 faiz azalıb. Belə kəskin azalma xarici kanallar üzrə (həm peyk, həm də yerüstü) qiymətlərin azalması, avadanlıqların ucuzlaşması və provayderlər arasında rəqabətin artması ilə əlaqədardır.
Yanvarın 24-nə olan rəsmi məzənnə 0,7862 AZN/USD təşkil edir.
