Azərbaycan, Bakı, 13 mart /Trend, müxbir H.Vəliyev/
Azərbaycan hökuməti növbəti 10 il ərzində informasiya kommunikasiya texnologiyaları (İKT) sahəsində layihələrin həyata keçirilməsinə 3,5 milyard dollar ayırmağı planlaşdırır. Trend-in məlumatına görə, bu barədə martın 5-7-də Dohada (Qətər) keçirilən "Connect Arab Summit" iclasında çıxışı zamanı Azərbaycanın rabitə və informasiya texnologiyaları naziri Əli Abbasov bildirib.
"Daha çox investisiya özəl sektordan gözlənilir. Özəl sektorun İKT-də rolunu genişləndirmək məqsədilə hazırda xüsusi təkmilləşdirilmiş maddi, maliyyə və investisiya mühiti yaradılır", - nazir deyib.
Nazirin sözlərinə görə, ərəb dünyası dinamik şəkildə dəyişməkdədir, xüsusən də Fars körfəzi ölkələrinə təsir göstərən sosial-iqtisadi inkişaf prosesində müəyyən irəliləyişlər əldə edilməkdədir. Bununla yanaşı, qeyri-körfəz və Afrika-ərəb ölkələrində həll olunmamış, vacib əhəmiyyət kəsb edən sosial-iqtisadi problemlər də mövcuddur.
Azərbaycan əhəmiyyətli dərəcədə analoji problemlərlə üzləşir.
Hazırda Avrasiya və ərəb regionundan ibarət olan dünyanın iki hissəsi arasında yalnız İKT sahəsində deyil, eləcə də təhsil, elm, iqtisadi və sosial sahələrdə böyük boşluqlar var.
Bu problem bütün səviyyələrdə, beynəlxalq səviyyədə, Beynəlxalq Telekommunikasiya İttifaqı, Rabitə sahəsində Regional Dövlətlər Birliyi, hökumətlər, eləcə də ekspertlər və akademik səviyyədə ardıcıl şəkildə araşdırılıb və müzakirə edilib.
"Bu problemin həll olunması üçün təklif olunan bütün rəy və tövsiyələr regionda yüksək qiymətlərin olması və xariclə zəif qoşulma imkanları, elektron təhsil, elektron səhiyyə, elektron kommersiya və s. kimi tətbiq sahələri daxil olmaqla zəif rəqəmsal xidmətlər, birbaşa xarici investisiya daxil olmaqla investisiya üçün əlverişli olmayan şərait və rəqabət üçün səmərəli mühitin olmaması, ixtisaslı kadrların kifayət qədər olmaması ilə nəticələnən aşağı keyfiyyətli təhsil sisteminə yönəlib", - nazir deyib.
Onun sözlərinə görə, Azərbaycanda və regionun bir çox ölkələrində sonuncu problemin aradan qaldırılması üzərində intensiv iş aparılır.