Azərbaycan, Bakı, 20 mart /Trend, müxbir H.Vəliyev/
Azərbaycanın poçt rabitəsi operatoru "Azərpoçt" MMC "Azerexpresspost" ekspress poçt xidməti Azərbaycan Səhiyyə Nazirliyinin informasiya mərkəzi üçün EMS (Express Mail Service) göndərişlərinin ekpress-çatdırılması üzrə xidmətlərin göstərilməsinə başlayır. Bu barədə çərşənbə axşamı Trend-ə "Azerexpresspost"dan bildiriblər.
Əldə olunmuş razılığa əsasən, "Azerexpresspost" həm respublika daxilində, həm də ölkədən kənarda EMS şəbəkəsindən istifadə etməklə dövlət idarələrinə operativ ünvanlı göndərişlərin çatdırılmasını və işlənməsini həyata keçirəcək.
Xidmət poçt göndərişləri hərəkətinin izlənməsi sistemi ilə inteqrasiya ediləcək ki, bu da real vaxt rejimində internet vasitəsilə poçt göndərişlərinin son təyinat nöqtəsinə çatmasını izləməyə imkan verəcək.
Xidmətin qiyməti kuryer çatdırmaları üzrə qüvvədə olan tariflərə uyğun olacaq və göndərişlərin sayından asılı olaraq, endirimlər tətbiq ediləcək.