Azərbaycan, Bakı, 4 sentyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi Amerika-Azərbaycan Ticarət Palatasının (AMCHAM) üzvləri ilə əməkdaşlıq perspektivlərini müzakirə edəcək. Trend-in məlumatına görə, bu barədə çərşənbə axşamı ticarət palatasının məlumatında deyilir.
Sentyabrın 10-da Bakıda keçiriləcək görüş çərçivəsində hökumət və informasiya texnologiyalarının özəl sektoru arasında dialoqun qurulması və münasibətlərin inkişafına yardım məsələlərinin müzakirə edilməsi planlaşdırılır. Tərəflər arasında əməkdaşlığın cari vəziyyəti və perspektivləri nəzərdən keçiriləcək.
Görüş Azərbaycanın dövlət sektorunun təşkilatın üzvləri ilə yaxınlaşmasına yardım edən ticarət palatasının təşəbbüsü ilə keçiriləcək.
Görüşdə Azərbaycan rabitə və informasiya texnologiyaları nazirinin müavini Elmir Vəlizadə iştirak edəcək.