Azərbaycan, Bakı, 6 sentyabr /Trend, müxbir H.Vəliyev/
Azərbaycanın ("Azərpoçt" MMC) və Gürcüstanın ("Gürcüstan Poçtu") poçt operatorları 2006-cı ilin iyununda tərəflər arasında imzalanmış əməkdaşlığa dair protokol çərçivəsində yerüstü poçt mübadiləsini bərpa ediblər. Bu barədə Trend-ə Rabitə və İnformasiya Texnologiyaları Nazirliyindən məlumat verilib.
Poçt mübadiləsi həftədə iki dəfə həyata keçirilir. Perspektivdə daşınmalar artdıqda gündəlik mübadiləyə keçmək, habelə tranzit poçtun daşınması planlaşdırılır.
Hazırda Azərbaycan yalnız İranla poçt daşımalarını həyata keçirir. Niyyət protokolunun mövcud olduğu Rusiya ilə də danışıqlar aparılır.
Azərbaycanla Gürcüstan arasında yerüstü poçt mübadiləsi 2007-ci ilin əvvəlində dayandırılıb. Buna səbəb Gürcüstan tərəfdən poçt yollamalarının həcminin azalması olub. Gürcüstan tərəfi poçt yollamalarının aviasiya ilə həyata keçirilməsini daha səmərəli hesab edib.