Azərbaycan, Bakı, 9 oktyabr /Trend, müxbir H.Vəliyev /
Azərbaycanın Rabitə və İnformasiya Texnologiyaları Nazirliyi mobil texnologiyalardan istifadə olunmaqla elektron rəqəmli imzaların verilməsi platformasının hazırlanması üzrə işlər həyata keçirir. Trend-in məlumatına görə, bu barədə rabitə nazirinin müavini İltimas Məmmədov deyib.
Onun sözlərinə görə, yeni platforma ilin sonunda istismara veriləcək ki, bu da elektron rəqəmli imzaların verilməsi prosedurunu sadələşdirməklə yanaşı, "elektron hökumət" portalı istifadəçilərinin dairəsini genişləndirməyə imkan verəcək.
Nazirliyin məlumatına görə, elektron rəqəmli imzaların verilməsi mərkəzinin istismara verildiyi andan 28 struktura 2078 ERİ verilib.