Azərbaycan, Bakı, 31 may /Trend, müxbir H.Vəliyev/
Azərbaycan telekommunikasiya sahəsinin regional səviyyədə tənzimlənməsi təşəbbüsü ilə çıxış edib. Bunu Trend-ə Rabitə və Yüksək Texnologiyalar Nazirliyindən bildiriblər.
Nazirlikdən deyiblər ki, qeyd edilən təşəbbüs rabitə və yüksək texnologiyalar naziri Əli Abbasov tərəfindən mayın 29-30-da İstanbulda keçirilmiş Telekommunikasiya sahəsinin tənzimlənməsi üzrə IX Beynəlxalq konfransda səsləndirilib.
Ə.Abbasov konfransda rouminq tariflərinin tənzimlənməsi, onların regional səviyyədə unifikasiyası təşəbbüsü ilə çıxış edib ki, bu da son istifadəçilər üçün əlverişli olması baxımından nəzərdən keçirilir.
Rouminq tariflərinin optimallaşdırılması sahəsində müəyyən nəticələrə nail olmaq üçün nazir bazarın tənzimləyicisi və rabitə operatorları arasında sazişin imzalanmasının əhəmiyyətini vurğulayıb.
Ə.Abbasovun toxunduğu önəmli məsələlər arasında tezlik resurslarının tənzimlənməsi və liberallaşdırılması, LTE şəbəkələrinin inkişafı üçün tezliklərin rasional istifadəsi də olub.
Nazirin fikrincə, hazırda dövlət qurumlarının, xüsusilə, güc strukturlarının nəzarətində olan müəyyən tezliklər telekommunikasiya sahəsinin ehtiyacları üçün ayrıla və kommersiya xidmətlərinin göstərilməsi məqsədilə istifadə edilə bilər.
O, regional səviyyədə internetin idarə edilməsi məsələsinin vacibliyini qeyd edib ki, bu da mövcud problemlərin həllinə müsbət təsir edə bilər. Söhbət şəxsi məlumatların təhlükəsizliyinin təmin edilməsindən, virtual aləmdə etik davranış normalarından və s. məsələlərdən gedir.