Azərbaycan, Bakı, 14 avqust /Trend, müxbir Hüseyn Vəliyev/
Azərbaycan və İran poçt rabitəsi sahəsində əməkdaşlıq prioritetlərini müəyyənləşdirəcək. Bunu cümə axşamı Trend-ə Rabitə və Yüksək Texnologiyalar Nazirliyindən bildiriblər.
Nazirlikdən deyiblər ki, hazırda iki ölkənin gündəliyində poçt daşımaları, poçt pul köçürmələrinin həyata keçirilməsi, poçt markalarının buraxılışı, məktublaşmaların çatdırılması üçün ölkələrin tranzit potensialından istifadə sahələrində əməkdaşlıq məsələləri dayanır.
Nazirlikdən bildiriblər: "Sonuncu məsələ quru yolla Naxçıvan Muxtar Respublikasına poçt göndərişlərinin çatdırılması üçün imkanların yaradılmasını nəzərdə tutur".
Azərbaycan və İranın poçt sahəsində əməkdaşlığı iki ölkənin poçt operatorları arasında sazişlə möhkəmləndiriləcək.
Sazişin müvafiq detallarının tərəflərin İranda keçiriləcək görüşü çərçivəsində müzakirəsi planlaşdırılır. Hazırda görüşün tarixi açıqlanmır.
