Cari ilin sonuna kimi Rabitə və İnformasiya Texnologiyaları Nazirliyinin müəssisələrindən biri olan Aztelekom İstehsalat Birliyi abunəçilərə CDMA (Code Division Multiple Access) xidmətləri göstərəcək. Rabitə Nazirliyinin informasiya mərkəzindən Trend ə verilən məlumata görə, İB-nin inzibati binasında 5 min nömrə tutumlu CDMA avadanlıqlarının quraşdırılması üzrə işlər başa çatıb.
Nazirlikdən, həmçinin, o da bildirilib ki, hazırda Sumqayıt, Sulutəpə, Fatmayi, Novxanı və Xırdalanda belə xidmətlərin göstərilməsi üçün ötürücü stansiyalar tikilir. Yeni xidmət növünün telefon indeksi 408 olacaq.
Bununla paralel olaraq, Bakı Telefon Rabitəsi İB CDMA üzrə analoji işlər aparır və bu işlərin cari ilin sonuna kimi başa çatacağı planlaşdırılır. CDMA avadanlıqları Çinin Huawei şirkəti tərəfindən tədarük olunur.
