ABŞ Ticarət və İnkişaf Agentliyi (USTDA- United States Trade and Development Agency) və AR rabitə və informasiya texnologiyaları nazirliyi arasında qrant sazişi çərçivəsində tədbirlərin gerçəkləşdirilməsinə başlanılıb. Nazirlikdə Trend ə bildirilib ki, həmin məqsədlə Strategic Policy Research, Inc. şirkəti mütəxəssislərinin Bakıya səfəri bu yaxınlarda başa çatıb və həmin səfər əsasən tanışlıq xarakteri daşıyırdı.
Səfər zamanı mütəxəssislər nazirliyin strukturu, onun müəssisələri ilə sazişdə nəzərdə tutulmuş sonrakı işlər üçün tanış olublar.
Agentliklə Nazirlik arasında saziş 2005-ci ilin yanvarında AR rabitə və informasiya texnologiyaları naziri Əli Abbasov və ABŞ-ın Azərbaycandakı səfirliyinin müvəqqəti işlər vəkili Ceyson Haylend tərəfindən imzalanıb.Qrantın həcmi təxminən $735 min təşkil edir.
Müddəti 2006-cı ilin iyulunda bitən saziş rabitə nazirliyinin strateji və təşkilati yenidən strukturlaşdırılmasına texniki yardım göstərilməsini nəzərdə tutur.
Saziş texnologiyalar, yenidən strukturlaşdırma və təşkilati idarəetmənin verilməsi ilə rabitədə məsləhətləşmə xidmətinin göstərilməsi, İKT sektorunda müasir təcrübə ilə nazirliyin bilgilərinin yaxşılaşdırılması üçün yardım və s. əhatə edir.
"ABŞ nümayəndələrinin həmin məsələ ilə bağlı növbəti səfərinin tarixi hələlik müəyyən edilməyib" -deyə dövlət strukturunda qeyd olunub.
