İnformasiya və kommunikasiya texnologiyaları üzrə iri şirkətlər Azərbaycanda texnoloji parkların yaradılması layihəsində maraqlıdır. Rabitə və İnformasiya Texnologiyaları Nazirliyindən Trend ə verilən məlumata görə, bu, Rabitə Nazirliyinin geniş tərkibli nümayəndə heyətinin ABŞ-a səfəri zamanı məlum olub.
Səfər çərçivəsində Əli Abbasov HP, İntel, Cisco Systems və Microsoft şirkətlərinin rəhbər şəxsləri ilə görüşüb.
Görüşdə şirkətlərin nümayəndələri vurğulayıb ki, Azərbaycanın IT bazarını dinamik inkişaf edən bazar kimi qiymətləndirir və bu sahədə Azərbaycan ilə əməkdaşlığı genişləndirməyə hazırdır.
Nazirlikdə hesab edilir ki, 2006-cı ilin sonlarında Azərbaycanda yüksək texnologiyaların inkişafı üzrə xüsusi iqtisadi zonaların yaradılması istiqamətində konkret işlərə başlanacaq.
Belə zonaların yaradılması üçün xidmətlərin göstərilməsi üzrə konsaltinq şirkətinin seçilməsi ilə bağlı tender elan edilib. Qalib şirkət Azərbaycanda yüksək texnologiyalar sektorunun vəziyyətini təhlil edəcək, ölkədə yüksək texnologiyalar üçün xüsusi zonaların yaradılmasının məqsədəuyğunluğunu müəyyən edəcək.
Layihədə 5 əsas komponent nəzərdə tutulub: Azərbaycanda elektron məhsulların istehsalı və ixracı, tranzit informasiya məkanının, texnoloji parkların və informasiya infrastrukturunun yaradılması.
