Bu gün Rotterdam məhkəməsində guya Rabitə Nazirliyi və Poçtbank AKB zəmanəti altında Rabitə Nazirliyinin mövcud olmayan müəssisələrinə (Aztell-ə 3035000 ABŞ dolları və Baktell-ə 1560000 ABŞ dolları) verilən kreditin ödənilməməsi faktı üzrə iddia ilə 2004-cü ilin iyul ayında Azərbaycan hökümətinə qarşı çıxış edən Maltanın FIMbank-ının (First International Merchant Bank) işi üzrə növbəti iclas keçirilir.
Rabitə Nazirliyindən Trend ə verilən xəbərə görə, bu gün məhkəmə şahidlərin ifadələrini dinləyəcək.
Əvvəl bank Rabitə Nazirliyinin 8 şahidini Azərbaycanda dinlənilməsinə dair təklifi ilə razılaşmayıb və dinləmələrin Rotterdamda keçirilməsinə təkid edib.
Azərbaycan artıq bu məhkəmə təhqiqatında ilk uğura nail olub. Noyabr ayında Nazirliyə Paris ali instansiya məhkəməsinin (Tribunal Le Grande Instance de Paris) oktyabrın 13-də keçirilmiş məhkəmə iclasının yekunu üzrə noyabrın 10-da qəbul olunmuş Azərbaycan tərəfinin xeyrinə rəsmi rəyi daxil olub.
Paris məhkəməsinin qərarına əsasən, bank Azərbaycan tərəfinə vurduğu mənəvi ziyana görə 5 min avro və məhkəmə -prosedur məsələlərinə xərclərə görə əlavə olaraq 900 avro ödəməlidir.