Azərbaycan, Bakı/ Trend müxbir S.Babayeva/ Azərbaycanın Rabitə və İnformasiya Texnologiyaları Nazirliyi ötən ilin sonunda yaradılmış İnformasiya Texnologiyalarının inkişafı naminə insan resursları xeyriyyə Fondunun qeydiyyatı üçün sənədləri Ədliyyə Nazirliyinə təqdim edib. Bu barədə bazar ertəsi Rabitə Nazirliyindən məlumat veriblər.
Nazirlikdə hesab edirlər ki, bu fond tərəfindən nəzərdə tutulmuş tədbirlərin həyata keçirilməsinə böyük ehtiyac var.
Bu gün fonda təqribən 20 IT şirkəti - AZEL, Sinam, Ultra, Catel, Azərcell, Bakcell, Azərfon, Microsoft və başqaları daxildir. Bu sıraya ölkənin digər şirkətləri də qoşula bilər.
Qurum qeydiyyatdan keçəndən sonra, fondun ilk iclasının keçirilməsi və idarə heyətinin seçilməsi planlaşdırılıb.
Fondun yaradılmasında əsas məqsəd xaricdə informasiya texnologiyaları sahəsində təhsil alınması ilə bağlı yerli kadrlara yardım etməkdir. Fondu özəl şirkətlər və Rabitə Nazirliyi maliyyələşdirəcək.