Azərbaycan, Bakı /müx. Trend S.Babayeva/ Rabitə və informasiya texnologiyaları naziri Əli Abbasov Türkiyənin ölkəmizdəki səfiri Hüseyn Avni Qarslıoğlu ilə görüşüb. Nazirliyin mətbuat xidmətinin yaydığı xəbərə görə, görüşdə rabitə və informasiya-kommunikasiya texnologiyaları sahəsindəki əməkdaşlığın genişləndirilməsinin vacibliyi vurğulanıb.
Tərəflər TAE fibrooptik kabel magistralının Xəzər seqmentinin çəkilməsi prosesinin sürətləndirilməsini, konsorsiumun yaradılmasını, eləcə də Azərbaycan, Türkiyə, Gürcüstan və Qazaxıstan nəqliyyat nazirlərinin iştirakı ilə sammitin keçirilməsi məsələsini müzakirə ediblər.
İstisna deyil ki, TAE magistralının tikintisinə 2007-ci ilin sonunadək başlanıla bilər. Artıq TAE kabelinin Şanxaydan tutmuş Frankfurtadək bütün seqmentlərində inşa işləri başa çatıb, yalnız Xəzər seqmenti qalıb. Bu səbəbdən də TAE kabeli ilə informasiya mübadiləsi tranzitlə İran və Rusiya ərazisi ilə gerçəkləşdirilir. Nəticədə bu, magistralın təhlükəsizliyini azaldır.
Layihin həyata keçiriləcəyi təqdirdə Azərbaycan regionda əsas tranzit ölkəsinə çevriləcək. Layihə Orta Asiyaya Azərbaycan vasitəsilə birbaşa Türkiyə ilə bağlantı qurmağa imkan verəcək. Eyni zamanda Azərbaycan, Türkiyə, Gürcüstan və digər dövlətlər Qazaxıstan vasitəsilə Çinlə əlaqə qura biləcəklər.
