Azərbaycan, Bakı / Trend /"Aztelekom" İstehsalat Birliyi Zərdab rayonunun mərkəzi ATS-nin yenidən qurulmasına dair tenderin qalibini elan edib. Bu barədə "Aztelekom"dan verilən məlumatda bildirilir.
Tender komissiyasının qərarına əsasən, Türkiyənin "Karel" şirkətinin təklifləri ən məqbul kimi dəyərləndirilib.
Qeyd edək ki, tenderdə iştirakın qiyməti 1,1 min manat olub.
"Aztelekom" Azərbaycanın Rabitə və İnformasiya Texnologiyaları Nazirliyinin əsas müəssisələrindən biridir. Bu müəssisə Naxçıvan Muxtar Respublikası istisna olmaqla Bakı və respublikanın bütün bölgələrini telefon rabitəsi, habelə beynəlxalq və şəhərlərarası rabitə ilə təmin edir.
"Aztelekom" tabeçiliyində olan 54 telekommunikasiya müəssisəsi ilə birlikdə özündə Bakı Beynəlxalq Telefon Qovşağı, Kabel Magistralının Texniki Qovşağı və Təmir-Tikinti İdarəsini birləşdirir.
Kənd yerlərində rabitənin bərpası ilə bağlı işlərlə yanaşı, "Aztelekom" bu sahədə həmçinin yenidənqurma və təkmilləşdirmə işləri ilə məşğuldur.
