Azərbaycan, Bakı/müxbir Trend S.Babayeva/ Azərbaycanda kompüterlərin istehsalı ilə məşğul olan yeganə zavod "KÜR" tələbatın artacağı təqdirdə fotoköşklərin istehsalını artıra bilər. Bu barədə müəssisənin rəhbəri Rizvan Osmanov məlumat verib.
Müəssisə ilkin olaraq 20 fotoköşk istehsal etməyi planlaşdırır. Onlardan bəziləri dövlət və özəl müəssisələrə artıq satılıb. Bununla yanaşı müəssisə informasiya köşkləri istehsal edir.
Fotoköşklər görkəminə görə bankomatlara bənzəyir, lakin onların funksiyalarına fotoşəklin çapı, disklərə yazılışı və hətta lazımi fotoşəkillərin mobil telefona ötürülməsi daxildir. İnformasiya köşkü informasiya almaq mümkün olan yerdir. Əsasən sensor ekranı ilə kompüter terminalı kimi təqdim olunur. Köşklər əsasən hava limanları və dəmir yolu vağzallarında qoyulur, burada yerləşən köşklər şəhərlər, marşrutlar və reyslər barədə informasiya verir.
"KÜR" böyük payı Rabitə və İnformasiya Texnologiyaları Nazirliyi və Azərbaycanın "Sinam" şirkətinə məxsus olan birgə müəssisədir.
