Azərbaycan, Bakı, 12 mart /Trend, müxbir H.Vəliyev/
Azərbaycan və Qazaxıstan fiber-optik kabel magistralının Transxəzər seqmentinin tikintisi layihəsini müzakirə edib. Bu barədə bazar ertəsi Trend-ə TASIM (Transmilli Avrasiya superinformasiya magistralı) layihəsi üzrə işçi qrupunun rəhbəri İlyas Naibov-Əylisli məlumat verib.
Məsələyə martın əvvəlində Budapeştdə keçirilən TASIM layihəsi iştirakçılarının üçüncü görüşü çərçivəsində baxılıb.
Naibov-Əylislinin sözlərinə görə, kabel magistralının Xəzər seqmentinin tikintisi ikitərəfli qaydada müzakirə edilib və bu məsələdə çox şey maliyyə aspektlərindən asılıdır. Ümumilikdə bu məsələ üzrə tərəflər irəliləyiş əldə ediblər.
"TASIM tikinti layihəsi üzrə texniki işlərın 2013-cü ilin sonuna qədər başa çatdırılması planlaşdırılır. Çox şey kabel sisteminin qurulmasından asılı olacaq ki, bu da layihənin vacib tərkib hissəsidir. Layihəyə cəlb edilən operatorların şəbəkələri ümumilikdə olduqca inkişaf edib və kabel magistralının əlavə çəkilməli olduğu sahələrdə işlər aparılmalıdır. Bu sahələrdən biri Xəzər seqmentidir", - Naibov-Əylisli deyib.