Azərbaycan, Bakı, 21 dekabr /Trend, müxbir E.Tariverdiyeva/
Dekabrın 21-də Böyük Britaniyanın tədqiqat mərkəzi LINKS "Qarabağ: dərin müzakirə" məruzəsinin ikinci hissəsini dərc edib. Bu barədə Trend-ə LİNKS qeyri-hökumət təşkilatının icraçı direktoru Dennis Sammut deyib.
Araşdırmanın bu hissəsində Azərbycanın siyasi partiyalarının baxışları öz əksini tapıb.
Sammutun sözlərinə görə, gələcəkdə LINKS separatçı Dağlıq Qarabağın erməni siyasətçilərin və münaqişə nəticəsində Dağlıq Qarabağın ərazisindən qovulan Azərbaycan siyasətçilərinin fikirlərini də dərc etməyə ümid edir.
"Bu iş bizim Qarabağ münaqişəsi ilə bağlı müzakirələrin artırılması və onun həm ermənilər, həm azərbaycanlılar arasında nizamlanması çərçivəsində səylərimizin bir hissəsidir. Bu müzakirə iki ölkə arasında sülh danışıqlarına kömək edəcək", - o bildirib.
LINKS-in bu gün dərc edilən araşdırmasında qeyd edilib ki, Azərbaycanın siyasi partiyaları Azərbaycanın ərazi bütövlüyünün bərpası, yəni Dağlıq Qarabağın və bu əraziyə bitişik ərazilərin qaytarılması əsasında Qarabağ münaqişəsinin həlli axtarışında kifayət qədər həmfikirdirlər.
"Dağlıq Qarabağa Azərbaycanın tərkibində geniş muxtariyyətin verilməsinin zəruriliyi ilə bağlı geniş fikir mövcuddur", - araşdırmada deyilir. "Bir sıra tərəflər bunu necə etməklə bağlı plan hazırlayıblar. Eyni zamanda, bəzi partiyalar hesab edirlər ki, orada sülhməramlı qüvvələrin yerləşdirilməsinə ehtiyac var", - LİNKS-in araşdırmasının giriş hissəsində deyilir.
Araşdırmaya əsasən, partiyaların spikerləri Azərbaycan demokratiyasının möhkəmləndirilməsinin zəruriliyini qeyd edərək, Dağlıq Qarabağın erməni əhalisinin Azərbaycana qayıtmasını daha cəlbedici etmək üçün bundan vasitə kimi istifadə etməyin zəruriliyini vurğulayıblar.
LINKS-in sorğu apardığı partiyaların əksəriyyəti hərb yolunu problemin mümkün həlli kimi nəzərdən keçirirlər. "Digər vasitələr nəticə verməsə, Azərbaycan nəyin bahasına olursa-olsun hərbi varianta əl atmağa məcbur olacaq", - araşdırmada deyilir.
Məruzədə beynəlxalq ictimaiyyətin, Minsk prosesinin və aparıcı beynəlxalq oyunçuların rolu ilə bağlı xeyli müxtəlif fikirlər əks olunub. Sorğu aparılanların hamısında bununla bağlı şübhələr olub. Həmişə olduğu kimi, yalnız Türkiyənin rolu alqışlanır.
Araşdırmaya əsasən, Avropa İttifaqı Dağlıq Qarabağ üzrə danışıqlarda vasitəçilikdə müsbət amil kimi nəzərdən keçirilir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
