İran, Tehran, 15 fevral / Trend , müxbir A.Namdari / İranın cənub-şərqində Cundullah terror şəbəkəsini aradan qaldırmaq üçün rəsmi Tehran bu regiondakı bəluçlara daha çox güvənməlidir - deyə bəluçların parlamentdəki nümayəndəsi Əbduləziz Cəmşidzehi Trend -a bildirib.
İranın Bəluçistan əyalətində fəaliyyət göstərən Cundullah qrupu fevralın 14-də saytında yaydığı məlumata əsasən, Saravan şəhərinin magistral yolunda bomba qoyaraq, doqquz İran polis işçisini öldürüb. Reuters ölənlərin sayının dörd nəfər olduğunu qeyd edib. İran rəsmiləri bu haqqda rəsmi açıqlama verməyiblər.
Cəmşidzehi bu hadisədən xəbərsiz olduğunu bildirərək, əlavə edib ki, Bəluçistanda təhlükəsizlik baxımından hər şey normaldır.
Bəluçların parlamentdəki nümayəndəsi Bəluçistandakı təhlükəsizliyin qorunması üçün yerli hərbi polis qüvvələrindən istifadə olunmağını Cundullahın terror aktlarının aradan qaldırmaq üçün yeganə yol kimi hesab edir: "Çox pis bir haldır ki, digər şəhərlərdən Bəluçistana hərbi qüvvə gətirilib"-deyə O, bazar günü bildirib.
Sünni məzhəbli Cundullah qrupu "milli və məzhəb" azadlıqlarının bəluçlara verilməsi üçün İran hakimiyyətilə silahlı mübarizə aparıb, indiyədək dəfələrlə hərbi qüvvələrə qarşı terror aktı törədib. Bu qrup 2008-ci ilin dekabrında girov götürdüyü 19 İran hərbçisini qətlə yetirib, keçən ay isə, maşına quraşdırılmış bomba ilə Səravandakı hərbi qərargaha hücum edərək, bombanı partladıb.
Rəsmi Tehran Cundullahı terrorist qrup kimi tanıyır və bu qrupun əsas qərargahını Pakistanın İranla sərhəd regionlarında olduğunu iddia edir.
Məqalə müəllifi ilə əlaqə ünvanı - [email protected]
