Gürcüstan, Tbilisi, 18 may /Trend, müxbir N.Kirsxaliya/
Xristian-demokratların lideri Georgi Tarqamadze bu gün seçkiqabağı kampaniya çərçivəsində etnik azərbaycanlılarla görüşüb. Görüş Bolnisidə baş tutub. Burada yerli sakinlər onu neçə illərdir həll edə bilmədikləri problemləri ilə tanış ediblər.
Onkoloji xəstəliklərin yayılması və uşaqlar arasında ölüm hallarından danışarkən rayondakı statistika çox narahatedicidir. Ciddi problemlərdən biri torpaqların qeyri-bərabər paylanması və məhsulun satılması məsələsidir. Həmçinin təbii qazın qiymətinin 1 kubmetrə 53 tetri (1 dollar = 1,78 lari) olması sakinləri narahat edən problemlərdən biridir.
Tarqamadze yerli sakinlərə xristian-demokratlardan olan majoritar namizəd Yelena Qoqebaşvilini təqdim edib.
"Bizim prioritetimiz Gürcüstanın bütün vətəndaşlarının maraqlarının bərabər nəzərə alınması və mənim Bolnisidə qarşılaşdığım bu ədalətsiz mühitin ədalətli mühitə çevrilməsidir. Əminəm ki, bizim və sizin maraqlarınız üst-üstə düşür və bu, gələcək seçkilərə mütləq öz təsirini göstərəcək", - Tarqamadze deyib.