Azərbaycan, Bakı, 17 oktyabr /Trend, müxbir E. Tariverdiyeva/
İran və ABŞ arasında xalq diplomatiyası qurulmalıdır.
Trend-in İranın "Bahar" qəzetinə istinadən verdiyi məlumata görə, bu barədə İran Parlamentinin birinci vitse-spikeri Məhəmməd Rza Bahənar bildirib.
Onun sözlərinə görə, rəsmi diplomatiyanın imkanları məhduddur, xalq diplomatiyasında isə belə məhdudiyyətlər yoxdur.
Parlamentin birinci vitse-spikeri, o cümlədən keçmiş İran rəhbərliyini bu cür diplomatiyadan istifadə etmədiyinə görə tənqid edərək əlavə edib ki, xalq diplomatiyası futbol oyunundan, həmçinin Parlament və ya lobbi qruplarının məsləhətləşmələrindən də başlaya bilər.
O vurğulayıb ki, vaxt həm İran, həm də ABŞ administrasiyası üçün məhdudlaşır. Bahənarın sözlərinə görə, İran ilk addımları atıb və indi ABŞ-dan cavab addımlarını gözləyir.
Hər iki ölkə arasında münasibətlərin bərpa olunması barədə sualı şərh edən birinci vitse-spiker bildirib ki, "əgər proses qırılsa, onda vəziyyət əvvəlkindən də pis olacaq".