Azərbaycan, Bakı, 22 yanvar /Trend/
Rusiyanın xarici işlər naziri Sergey Lavrov və ABŞ dövlət katibi Con Kerri İsveçrənin Montrö şəhərində Suriya üzrə "Cenevrə 2" sülh konfransını və İsrail-Fələstin nizamlanmasını müzakirə ediblər. Trend-in məlumatına görə, bu barədə Rusiya KİV-i RF XİN-ə istinadən məlumat verib.
Görüş "Cenevrə 2"-nin başlayacağı ərəfədə keçirilib.
Məlumatda deyilir: "Suriyada qan tökülməsinin tezliklə dayandırılması və vahid, müstəqil, demokratik, dünyəvi dövlət kimi gələcək Suriyanın ümumi görüntüsünün işlənməsi üçün hərtərəfli dialoqun əldə olunması diqqət mərkəzində olub".
XİN-in məlumatına görə, habelə Fələstin-İsrail danışıqlar prosesinin perspektivləri haqqında da fikir mübadiləsi aparılıb. Bundan başqa, tərəflər Yaxın Şərq regionunda ümumi vəziyyətin sabitləşməsi məsələsini də müzakirə ediblər.