Bakı. Trend:
Fələstinin radikal HƏMAS hərəkatının Qəzza zolağındakı hərbi qanadının komandiri Mahmud Həmdan oktyabrın 18-də İsrail hərbçiləri tərəfindən məhv edilib.
Trend xəbər verir ki, bu barədə İsrail ordusunun mətbuat xidməti məlumat yayıb.
Həmdanın öldürüldüyü yer, HƏMAS lideri Yəhya Sinvarın ölümünün qeydə alındığı əraziyə yaxın olub.
İsrail ordusunun məlumatına görə, Həmdan Qəzza zolağının cənubundakı Tell əs-Sultan bölgəsində HƏMAS batalyonuna komandanlıq edib və Sinvarın mühafizəsini təşkil edib. Həmçinin, bölgədə əvvəlki döyüşlərdə öldürülmüş altı israilli girovu saxlayan qrupun da nəzarətində olub.
Ordu bildirib ki, bir neçə həftə əvvəl əldə olunan kəşfiyyat məlumatları Həmdanın artıq öldürüldüyünü göstərirdi, lakin son günlərdə bu məlumat yenidən nəzərdən keçirilib. "İndi aydın oldu ki, həmin qiymətləndirmə natamam idi və Həmdan hələ də Sinvarı qoruyurdu. Bu gün, cümə günü, Mahmud Həmdan Sinvarın öldürüldüyü yerdən təxminən 200 metr məsafədə İsrail Müdafiə Qüvvələri tərəfindən öldürülüb", - məlumatda deyilir.
HƏMAS daha əvvəl xüsusi açıqlama yayaraq, Həmdanın İsrail qüvvələrinin hücumu nəticəsində öldüyünü təsdiqləmiş, həmçinin Sinvarın da həmin hücumda həlak olduğunu bildirmişdi. Açıqlamada qeyd olunub ki, Sinvar Həmdanı müşayiət edirdi.