Bakı. Trend:
Serbiyanın paytaxtı Belqradın mərkəzində yerləşən tikinti sahəsində İkinci Dünya müharibəsindən qalma 470 kiloqramlıq bomba zərərsizləşdirilib.
Trend xəbər verir ki, söhbət ABŞ istehsalı olan AN-M44 bombasından gedir. Məlumata görə, sursat 1944-cü ildə Belqradın nasist işğalından azad edilməsi zamanı müttəfiqlərin Almaniya ordusunun mövqelərinə endirdiyi hava zərbələri zamanı istifadə olunub.
Polisin açıqlamasında bildirilib ki, yaşayış binaları və ticarət mərkəzinin yaxınlığında yerləşən tikinti ərazisi əməliyyatın təhlükəsizliyini təmin etmək məqsədilə hərtərəfli yoxlanılıb. Sakinlərdən mümkün olduqda avtomobillərini ərazidən götürmələri və evlərini müvəqqəti tərk etmələri xahiş olunub.
Bomba Belqraddan 180 kilometr məsafədə yerləşən hərbi sınaq poliqonuna daşınıb və yaxın günlərdə orada məhv ediləcək.