Bakı. Trend:
Baş Prokurorluğun Cinayət təqibindən kənar icraatlar idarəsində
respublika tabeli şəhər və rayonlarda qanunsuz ağackəsmə faktları
ilə bağlı araşdırma aparılıb.
Baş Prokurorluğun Mətbuat xidmətindən Trend-ə verilən məlumata
görə, araşdırmalar zamanı Ağsu, Samux və Bakı şəhərinin Səbail
rayonu, həmçinin Sumqayıt şəhəri ərazisində meşə fonduna daxil
olmayan, ümumilikdə 900 ədəd ağac və kolların qanunsuz kəsilməsi
nəticəsində təbiətə 94 min manatdan çox ziyan vurulmasına əsaslı
şübhələr müəyyən edilib.
Qeyd edilən faktlarla bağlı Cinayət Məcəlləsinin 259.1, 259.2.3 və 259.2.4-cü (xeyli miqdarda ziyan vurmaqla, qulluq mövqeyindən istifadə etməklə və külli miqdarda ziyan vurmaqla qanunsuz ağac kəsmə) maddələri ilə cinayət işləri başlanaraq istintaqın aparılması üçün aidiyyəti üzrə daxili işlər orqanlarına göndərilib.