Azərbaycan, Şəki,12 fevral / Trend ", müxbir E.Quliyev/ Zaqatala rayonunun Qımır kəndində fevralın 12-nə keçən gecə quduzlaşmış canavarlar fərdi təsərrüfatlara hücüm edib. Trend in bölgə müxbirinin məlumatına görə, canavarlar kənd sakini Valeh Məmmədovun bir baş iribuynuzlu heyvanını parçalayıb.
Zaqatala rayonunda son bir ayda canavarların fərdi təsərrüfatlara üç dəfə hücum faktı qeydə alınıb.
Ekologiya və Təbii Sərvətlər Nazirliyinin (ETSN) 9 saylı Ərazi Ekologiya və Təbiəti Mühafizə İdarəsinin bölmə rəisi Zakir Əliyev Trend ə meşə yaxınlığında yerləşən kəndlərdə ev heyvanlarının canavarların hücumuna məruz qalması faktını təsdiqləyib. O, bu istiqamətdə qabaqlayıcı tədbirlərin görülməsi üçün rayon rəhbərliyi səviyyəsində iş aparılmasını zəruri hesab edib. Əliyevin dediyinə görə, ovçular cəmiyyətinin üzvü olan şəxslər, cəmiyyətin üzvlük haqqını ödəməkdə çətinlik çəkirlər. Belə olan halda, onlara maddi yardım göstərilməli və ovçuları sursatla tam təmin edərək, kəndlərdə canavarların məhv edilməsinə cəlb etmək gərəkdir.
Zaqatala paytaxt Bakıdan 418 km məsafədə yerləşir.
Müəlliflə əlaqə saxlamaq üçün elektron ünvan - [email protected]