Azərbaycan, Bakı, 19 sentyabr / Trend , müxbir S.Kazımlı/ Bakının Binəqədi rayonunda 20 yaşlı gənc idarə etdiyi avtomobillə polis əməkdaşını vuraraq öldürüb.
Binəqədi rayon Polis İdarəsindən (RPİ) çümə günü Trend - a məlumat görə, sentyabrın 18 -də saat 23 : 00 radələrində Cavadxan küçəsində, Bakı sakini Anar Əmrah oğlu Abdulrəhimov idarə etdiyi "VAZ- 2107" markalı avtomobillə həmin ərazidə xidmətdə olan, Daxili İşlər Nazirliyinin Cevik Polis Alayının polis serjantı, 22 yaşlı Rüstəm Eldar oğlu Qasımovu vuraraq, hadisə yerindən qaçıb.
Qasımov Respublika Xəstəxanasına aparılsa da, həkimlər onun həyatını xilas edə bilməyiblər. O, aldığı ağır xəsarətlər nəticəsində xəstəxanada ölüb.
Rayon Polis İdarəsindən bildiriblər ki, keçirilən əməliyyat - axtarış tədbirləri nəticəsində Abdulrəhimov tutulub.
Faktla bağlı Binəqədi RPİ - də Azərbaycan Cinayət Məcəlləsinin avtomobil, tramvay və ya digər mexaniki nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması, ehtiyatsızlıqdan zərərçəkmiş şəxsin ölümünə səbəb olduqda (263.1 - ci) və yol nəqliyyat hadisəsi yerindən qaçma (264 - cü) maddələri ilə cinayət işi başlanılıb, istintaq aparılır.
Azərbaycan Cinayət Məcəlləsinə görə, qeyd olunan maddələrlə təqsirləndirilən şəxsin təqsiri istintaqda və ya məhkəmədə sübuta yetirilərsə, həmin şəxs üç ilədək müddətə nəqliyyat vasitələrini idarə etmək hüququndan məhrum edilməklə, iki ildən altı ilədək müddətə azadlıqdan məhrumetmə və üç ilədək müddətə nəqliyyat vasitələrini idarə etmək hüququndan məhrum edilməklə, üç ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır.
Məqalə müəllifi ilə əlaqə ünvanı: [email protected]
