Azərbaycan, Bakı, 20 oktyabr / Trend , müxbir S.Kazımlı / Bakının Xətai rayonunun ərazisində 17 yaşlı gənc idarə etdiyi avtomobillə Müdafiə Nazirliyinin "N" saylı hərbi hissəsinin mayorunu vuraraq öldürüb.
Xətai rayon Polis İdarəsindən (RPİ) bazar ertəsi Trend - a verilən məlumata görə, oktyabrın 19 - da saat 02.00 radələrində Xətai rayonundakı Gəncə prospektində, həmin prospektdə yaşayan 17 yaşlı Kənan Əliyev "Mercedes" markalı avtomaşını idarə edərkən Müdafiə Nazirliyinin "N" saylı hərbi hissəsinin mayoru, 32 yaşlı Sergey Puqaçovu və Bakı şəhər sakini, Dövlət Neft Şirkəti Xəzər Dənizinin Neft - Qaz Donanmasının 2 - ci mexaniki, 33 yaşlı Nikolay Yermakovu vurub. Nəticədə, Puqaçov hadisə yerində ölüb. Yermakova xəstəxanada tibbi yardım göstərildikdən sonra evə buraxılıb. Hadisəni törədən Əliyev polislər tətəfindən saxlanılıb.
Faktla bağlı Xətai RPİ - də Azərbaycan Cinayət Məcəlləsinin avtomobil, tramvay və ya digər mexaniki nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması, ehtiyatsızlıqdan zərərçəkmiş şəxsin ölümünə səbəb olduqda (263.3 - cü) maddəsi ilə cinayət işi başlanılıb, istintaq aparılır.
Məqalə müəllifi ilə əlaqə ünvanı:[email protected]