Azərbaycan, Bakı, 04 noyabr / Trend , müxbir S.Kazımlı / Bakının Yasamal rayonunda yerləşən yanacaqdoldurma məntəqəsində silahlı insident baş verib.
"Mübahisə "Riyad" təhlükəsizlik şirkətinin əməkdaşı ilə yanacaqdoldurma məntəqəsinin əməkdaşı arasında yaranıb", - Yasamal rayon Polis İdarəsindən (RPİ) çərşənbə axşamı Trend -a bildirilib.
Məlumatda bildirilir ki, bir neçə gün öncə axşam saatlarında "Riyad" təhlükəsizlik şirkətinin mühafizəçisi, 23 yaşlı Bakı sakini Sənan Məmmədov rayon ərazisində yerləşən "Azpetrol" yanacaqdoldurma məntəqəsində, orada operator işləyən 20 yaşlı Bakı sakini Babək Məmmədovla mübahisə edib. Mübahisə zamanı Sənan Məmmədov üzərindəki və təhlükəsizlik şirkətinə məxsus pnevmatiq tapança ilə Babək Məmmədova hədə-qorxu gəlib.
Araşdırma zamanı məlum olub ki, Sənan Məmmədov aldığı yanacagın müqabilində Babək Məmmədova yararsız pul verib, sonuncu isə pulu almaqdan imtina edib. Bundan sonra onların arasında insident yaranıb.
Faktla bağlı Yasamal RPİ-də araşdırma aparılır.
Məqalə müəllifi ilə əlaqə ünvanı:[email protected]
