Azərbaycan, Bakı, 10 sentyabr /Trend, müxbir K.Zərbalıyeva/
Bakıda gənc oğlanı maşınında güllələyən şəxsin kimliyi müəyyənləşib.
Daxili İşlər Nazirliyinin mətbuat xidmətindən şənbə günü Trend-ə bildiriblər ki, 1981-ci il təvəllüdlü Taleh Məmmədov İsmayıl Qutqaşınlı küçəsində naməlum şəxs tərəfindən "VAZ 2107" markalı avtomobilində odlu silahla qətlə yetirilib.
Məlumata görə, DİN-in Baş Mühafizə İdarəsi, Bakı Baş Polis İdarəsi və Yasamal rayon Polis İdarəsinin birgə keçirdiyi əməliyyat nəticəsində qətlin münaqişə zəminində 1984-cü il təvəllüdlü Bakı sakini Müseyib Cəfərov tərəfindən törədildiyi müəyyənləşib.
Cəfərovun qardaşı 1971-ci il təvəllüdlü Mübariz Cəfərov hadisə zamanı istifadə edilən "Makarov" tipli tapançanı və 5 ədəd gülləni könüllü oraraq polisə təhvil verib.
Hazırda hadisəni törədən Cəfərovun tutulması üçün əməliyyat-axtarış tədbirləri davam etdirilir.
Faktla bağlı cinayət işi başlanıb, araşdırma aparılır.