Azərbaycan, Qazax / Trend , müxbir N.Fətullayeva/ Ağstafadakı qazdoldurma məntəqəsində baş vermiş yanğında xəsarət alanlardan daha ikisi bu gün dünyasını dəyişib.
Çərşənbə günü Ağstafanın qazdoldurma məntəqəsində yanğın baş verib, hadisə nəticəsində 9 nəfər müxtəlif dərəcəli xəsarət alıb. Onlardan biri dünən dünyasını dəyişib.
Bu gün isə daha iki nəfər - Qazax rayon xəstəxanasına yerləşdirilmiş 1946-cı il təvəllüdlü Qasımova Tamella Həmzə qızı səhər saat 10:30 radələrində, Ağstafa rayon xəstəxanasında olan 1983-cü il təvəllüdlü Şəlalə Yusif qızı Musayeva isə isə saat 9:30 radələrində vəfat edib.
Qazax rayon mərkəzi xəstəxanasının baş həkimi Arzu Novruzov Trend in müxbirinə bildirib ki, xəstəxanaya yerləşdirilmiş digər yaralı, 1986-cı il təvəllüdlü Seymur Nadir oğlu Aşurovun vəziyyəti ağır olaraq qalır.
Ağstafa rayon xəstəxanasında yerləşdirilən 1988-ci il təvəllüdlü Mikayılov Kamran Azad oğlunun da vəziyyəti ağırdır. Bakıdan göndərilmiş xüsusi həkim briqadası sözügedən hadisədən sonra Ağstafa rayon xəstəxanasında yerləşdirilmiş 5 nəfər yaralını müayinə edib və vəziyyəti daha ağır olduğundan Mikayılovun Bakıya göndərilməsinə qərar verilib.
Qeyd edək ki, avqustun 29-da baş vermiş həmin hadisə nəticəsində ölənlərin sayı ümümən 3 nəfərə çatıb.
Ağstafa rayon Polis İdarəsinin rəisi Rasim Əliyev hadisənin baş vermə səbəblərinin hələ müəyyənləşdirilməydini və araşdırma işlərinin davam etdirildiyini bildirib.