Azərbaycan, Bakı, 24 oktyabr /Trend/
Böyük Britaniya Kraliçası II Elizabet "Elizabeth R" adı altında ilk məlumatını dərc etməklə "Twitter" sosial şəbəkəsinin istifadəçilərinin sıralarını genişləndirib. Bu barədə Trend TASS agentliyinə istinadən məlumat verir.
Yazı Vindzor sarayının mikrobloqunda Londonun məşhur Elm Muzeyinin yeni qanadının açılışı zamanı meydana çıxıb. Orada informatika və kommunikasiyalara həsr edilmiş ekspozisiya yerləşir.
II Elizabetin yazdığı məlumatda deyilir: "Mən bu gün Elm Muzeyində "İnformasiya əsri" sərgisini böyük məmnuniyyətlə açdım. Ümid edirəm ki, insanlar buranı ziyarət etməkdən şad olacaqlar".
O, əvvəllər heç vaxt bu sosial şəbəkədəki mikrobloqlarda öz imzasını qoymayıb.
Yenidən qurulması 25 milyon dollara başa gələn muzeyin yeni qanadında 800-dən artıq eksponat nümayiş olunur, onların əksəriyyəti unikaldır. Belə ki, görkəmli Britaniya riyaziyyatçısı Alan Tyurinq tərəfindən yaradılan dünyada ilk kompüterin tam şəkildə qalan yeganə nüsxəsi sərgilənir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
