Azərbaycan, Bakı, 25 fevral / Trend , müxbir İ.Əlizadə/ Rəsmi Bakı hesab edir ki, Ermənistanda baş verən hadisələr Dağlıq Qarabağ münaqişəsinin həlli ilə bağlı aparılan danışıqlar prosesinə təsir göstərə bilməz. "Hesab edirəm ki, Ermənistanın xarici işlər naziri baş verən proseslərin Dağlıq Qarabağ münaqişəsinin həllinə mənfi təsir göstərəcəyinə dair fikri hansısa dairələrə təsir göstərmək və hakimiyyətin maraqlarına xidmət edən arqument kimi işlədib" - deyə bazar ertəsi Trend a açıqlamasında Azərbaycan Prezidentinin İcra Aparatının Beynəlxalq əlaqələr şöbəsinin müdiri Novruz Məmmədov bildirib.
Xarici işlər naziri Vardan Oskanyan jurnalistlərə müsahibəsində deyib ki, Ermənistandakı daxili vəziyyət Dağlıq Qarabağ münaqişəsinin nizamlanması prosesinə mənfi təsir göstərə bilər.
Məmmədov qeyd edib ki, Ermənistanın Mərkəzi Seçki Komissiyası Serj Sarkisyanın seçkidə qələbə qazandığını elan edib və bu nəticə dəyişməyəcək. "Dağlıq Qarabağ münaqişəsinin həlli yalnız beynəlxalq hüquq normaları əsasında və Azərbaycanın ərazi bütövlüyü çərçivəsində mümkündür. Bundan başqa heç bir həll varinatı yoxdur və ola da bilməz. Ermənistan rəhbərliyi erməni xalqının və dövlətçiliyinin gələcəyini düşünsə, bunu başa düşər və konsturuktiv mövqe tutar" - deyə Prezident Aparatının rəsmisi əlavə edib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk qrupu vasitəçilik edir.
