Azərbaycan, Bakı, 11 dekabr/ Trend , müxbir A.Hüseynbala/ Dağlıq Qarabağın Azərbaycanlı İcması İctimai Birliyinin həmsədri bu qurumun fəaliyyətinə ehtiyac olmaması barədə fikirlərlə razılaşmır.
"İcma fəaliyyətini davam etdirir. Mən və millət vəkili Elman Məmmədov birliyin həmsədri kimi qalırıq", - cümə axşamı Trend - a Dağlıq Qarabağın Azərbaycanlı İcması İctimai Birliyinin həmsədri, millət vəkili Həvva Məmmədova bildirib.
Trend - un arayışı: Şuşa Şəhər İcra Hakimiyyətinin başçısı Nizami Bəhmənovun vəfatından sonra Dağlıq Qarabağın Azərbaycanlı İctiması İctimai Birliyinə rəhbər təyin olunmayıb. Birliyin həmsədrlərindən biri, millət vəkili Elman Məmmədov ötən həftə Trend -a bu qurumun fəaliyyətinə artıq ehtiyac olmadığını da bildirib.
Həvva Məmmədovanın sözlərinə görə, Ermənistanın Azərbaycana təcavüzü aradan qaldırılmayınca, Qarabağdan olan hər kəs bu icmada fəallığını davam etdirməlidir.
Millət vəkili deyib ki, icmanın yeni rəhbərinin seçilməsi ilə bağlı müzakirələr aparılmır. "Bəlkə də kiminsə icmanın rəhbəri seçilməsinə ehtiyac yoxdur. Amma bizim icmadakı fəaliyyətimiz dayanmayıb", - birliyin həmsədri bildirib.
İcmanın fəaliyyətinin daha çox Nizami Bəhmənovun adı ilə bağlılığına gəldikdə, Məmmədova deyib ki, bu, mərhumun Şuşa şəhər icra hakimiyyətinin başçısı olmasından irəli gəlib.
"Bildiyiniz kimi, Şuşa Dağlıq Qarabağın özəyi olduğundan, icmaya rəhbərliyi də o edib. Amma icma daxilində hamımızın səlahiyyəti eyni olub", - millət vəkili qeyd edib.
İcmanın həmsədri yaxın müddətdə icmaya yeni rəhbərin seçiləcəyini də istisna etməyib: "Məncə, Şuşa şəhərinə yeni təyin olunacaq icra başçısının icmaya rəhbərlik etməsi də mümkündür", - Məmmədova deyib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. Bu ərazilər 1992 - ci ildən indiyədək Ermənistan Silahlı Qüvvələrinin işğalı altındadır. 1994 - cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir. Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məqalə müəllifi ilə əlaqə ünvanı: [email protected]
