Azərbaycan, Bakı, 11 mart / Trend , müxbir E.Tarıverdiyeva/
Həmsədrlərlə iş gedir, onlar Azərbaycan xarici işlər naziri Elmar Məmmədyarovla görüşüblər və növbəti həftə Moskvada Ermənistan xarici işlər naziri Edvard Nalbandyanla görüşəcəklər. Bu barədə cümə axşamı Moskvada keçirilən brifinqdə RF XİN-in rəsmi nümayəndəsi Andrey Nesterenko bildirib. Məlumatı "Vesti" telekanalı yayıb.
"ATƏT-in Minsk qrupunun həmsədrləri danışıqlardan sonra Dağlıq Qarabağ münaqişəsinin nizamlanması məsələsi üzə tərəflərin mövqeyini yaxınlaşdırmaq üçün martın sonu, aprelin əvvəlində bütün görüşlərin yekunları üzrə Bakı və Yerevana səfər edəcək", - Nesterenko deyib.
Onun sözlərinə görə, Rusiya danışıqların gedişini normal qiymətləndirir, ATƏT-in Minsk qrupu tərəfindən tərəflərə təqdim edilən Madrid prinsiplərinin yenilənmiş variantının - Dağlıq Qarabağ münaqişəsinin nizamlanmasının əsas bəndlərinin müzakirəsi gedir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurası Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
