...

Nazir: Küveyt Dağlıq Qarabağ münaqişəsində Azərbaycanla həmrəydir

Ermənistan-Azərbaycan münaqişəsi Materials 23 Aprel 2013 17:35 (UTC +04:00)
Küveyt Dağlıq Qarabağ münaqişəsi məsələsində Azərbaycanın mövqeyi ilə həmrəydir və problemin tez bir zamanda siyasi yolla həllini arzulayır.

Azərbaycan, Bakı, 23 aprel /Trend, müxbir A.Tağıyeva/

Küveyt Dağlıq Qarabağ münaqişəsi məsələsində Azərbaycanın mövqeyi ilə həmrəydir və problemin tez bir zamanda siyasi yolla həllini arzulayır. Bu barədə Trend-ə müsahibəsində Küveytin informasiya və gənclər naziri Şeyx Salman Sabah əs-Səlim Al Humud Al Sabah bildirib.

"Biz Dağlıq Qarabağ münaqişəsinin tez bir zamanda həll edilməsini və bu məsələdə ədalətin bərqərar olmasını arzulayırıq. Küveyt Dağlıq Qarabağ münaqişəsində Azərbaycanla həmrəydir", - Al Sabah deyib.

Küveyt-Azərbaycan əməkdaşlığına gəldikdə, nazirin sözlərinə görə, iki ölkə arasında əməkdaşlıq artan templərlə inkişaf edir və gələcək inkişaf üçün potensial var.

"Azərbaycan qardaş ölkədir və Küveyt gələcəkdə də Azərbaycanla müxtəlif istiqamətlərdə tərəfdaşlığı möhkəmləndirmək məqsədilə səyləri artırmaq niyyətindədir", - Al Sabah bildirib.

Nazir iki ölkə arasında mədəniyyət sahəsində əməkdaşlığı, o cümlədən Bakıda Küveyt günlərinin, əl-Küveytdə isə Azərbaycan günlərinin keçirildiyini xüsusilə qeyd edib.

Al Sabahın sözlərinə görə, ölkələr mədəniyyət və təhsil sahələrində bir sıra layihələr həyata keçirmək niyyətindədirlər və bu məqsədlə Küveyt və Azərbaycanın rəsmi şəxslərinin vaxtaşırı qarşılıqlı səfərləri baş tutur və məsləhətləşmələr aparılır.

Küveytli nazir, həmçinin öz ölkəsinin Azərbaycanla əməkdaşlığı inkişaf etdirmək arzusunu ifadə edərək vurğulayıb ki, Küveyt rəhbərliyi iki ölkə arasında qardaşlıq münasibətlərinin saxlanılması üçün əlindən gələni edəcək.

Məqalədə:
Xəbər lenti

Xəbər lenti